Viðtal við Sigurð Ingimundarson landsliðsþjálfara

kki.is hafði samband við Sigurð Ingimundarson landsliðsþjálfara og spurði hann út í leikinn mikilvæga við Rúmena á sunnudaginn.

Hvernig leggst leikurinn við Rúmena í þig?
Mjög vel, mikilvægasti leikur okkar í langan tíma og því mikilvægt að við náum að spila vel og að fólk mæti á leikinn og sýni liðinu stuðning.

Hvað veistu um Rúmena og hvernig hentar okkur að leika gegn þeim?
Rúmenar eru ekki ósvipaðir okkur í styrkleika. Þeirra aðalmaður er miðherji Virgil Stanescu sem er ansi flinkur og þeirra leikur byggist nokkuð mikið á honum. Við þurfum að spila okkar leik, vera afslappaðir og vissir um að við getum sigrað.

Nú byrjaði leikurinn við Dani mjög vel, hvað fór svo úrskeiðis?
Já, það er rétt leikurinn byrjaði vel , en svo fór samleikur meira að vera að einleik ef svo má segja og hlutir versnuðu.


Svæðisvörnin var alls ekki að virka gegn skyttum Dana, getum við bætt hana þannig að hún verði vopn gegn Rúmenum?
Það er nú þannig að eftir leiki þá eru allir hlutir skoðaðir og farið yfir hvað var gott og hvað var slæmt , síðan er sett upp nýtt leikskipulag í næsta leik og treyst á að það sé það eina rétta.

Okkar gekk líka illa að sækja inní teig gegn hávöxnum (nema í 1. leikhl.) Dönum. Verðum við að algjörlega að treysta á langskotin í leiknum á sunnudaginn?
Nei , við þurfum að hafa gott jafnvægi á skotvali okkar gegn Rúmeníu. Við munum keyra upp völlinn og skoða hvort einhverjir möguleikar opnast , og síðan að taka besta skot sem býðst hverju sinni og spila óeigingjarnan körfubolta.

Hve mikilvægur er leikurinn í ljósi þess að Danir unnu Rúmena í Rúmeníu á miðvikudag?
Þessi leikur er úrslitaleikur fyrir okkur uppá framhaldið. Með sigri erum við í góðum málum, ef við töpum þá eru möguleikar okkar á að komast áfram úr riðlinum nánast úr sögunni.

Hve miklu máli skiptir stuðningur áhorfenda í leiknum?
Þegar allt er undir í einum leik þá er það ljóst að það er mikið atriði fyrir okkur að hafa fullt af góðum áhorfendum og finna fyrir stuðningi við íslenskan körfuknattleik.

Hve miklu máli skiptir endurkoma Friðriks Stefánsson fyrir liðið?
Það er ljóst að það skiptir miklu máli. Friðrik er reynslumesti leikmaðurinn í landsleikjum og mun hjálpa mikið til í þessum leik.

Viltu spá fyrir um úrslit leiksins?
Við vinnum þennan leik.