20. úrslitakeppni úrvalsdeildar karla hefst í kvöld með tveimur leikjum í átta liða úrslitum Intersportdeildarinnar. Deildarmeistarar Grindvíkinga fá Hamar í heimsókn til Grindavíkur og KR-ingar taka á móti Njarðvík í DHL-Höllinni. Báðir leikirnir hefjast klukkan 19:15.

Hin tvö einvígin í átta liða úrslitunum fara í gang á morgun þegar ÍR-ingar fara til Keflavíkur og Haukar taka á móti Tindastól á Ásvöllum. Átta liða úrsltin klárast um helgina nema ef til oddaleikja kemur en þeir munu fara fram á mánudag og þriðjudag.

Búast má við hörkuviðureignum þar sem Hamar sigraði Grindavík í síðustu umferð deildarinnar. Auk þess sem meiðsl plaga lykilmenn Grindavíkinga. KR og UMFN hafa marga hyldi háð í úrslitakeppninni og er skemmst að minnast þess að Njarðvíkingar slógu KR út í undanúrslitum í fyrra. Sá leikur var einmitt á heimavelli KR.

Fyrsta úrslitakeppnin fór fram vorið 1984 en fyrstu ellefu tímabilin var hún skipuð fjórum liðum. Frá 1995 hefur úrslitakeppnin hinsvegar verið skipuð átta liðum.

Undir greinum má finna öll úrslit í sögu úrslitakeppni úrvalsdeildar karla 1984 til 2002 og eins er gott aðgengi þar að tölfræði leikjanna. Greinina má nálgast hér

Úrslitakeppni Intersport-deildarinnar 2003

Intersport-deildin 2002-2003

Saga úrslitakeppni úrvalsdeildar karla 1984-2002