Það verða Keflavík og Snæfell sem mætast í bikarúrslitum KKÍ og Doritos karla en liðin tryggðu sér sætin í dag og í gær. Keflavík vann ÍR, 95-81, í gær en Snæfell vann Hamar, 82-76, á heimavelli sínum í kvöld. Keflavík og Snæfell mætast þar með í annað sinn í bikarúrslitaleik því þau mættust einnig fyrir tíu árum síðan en þá vann Keflavík öruggan 115-76 sigur. Líkt og þá á Keflavík einnig kvennalið í bikarúrslitum og getur þar með unnið tvöfaldan sigur í bikarnum í ár. Úrslitaleikurinn í ár fer fram 8. febrúar næstkomandi.