Íslenska karlalandsliðið í körfuknattleik tapaði gegn Kýpur með 67 stigum gegn 68 í dag. Staðan í hálfleik var 38 stig gegn 29 Kýpurmönnum í vil. Kýpurmenn byrjuðu mun betur en íslenska liðið og var fyrri hálfleikurinn frekar slakur hjá Íslendingum. Síðari hálfleikur var mun betri og náði Ísland að jafna undir lok leiksins. Kýpurmenn áttu síðustu sóknina, keyrðu inn í vörnina og fengu dæmda villu þegar ein sekúnda var eftir af leiknum. Skoruðu þeir úr fyrra skotinu.
Stigahæstir í íslenska liðinu voru þeir Jón Arnór Stefánsson og Friðrik Stefánsson með 18 stig og Skarphéðinn Ingason með 8 stig. Friðrik Stefánsson tók jafnframt 15 fráköst.

All nokkrar breytingar hafa verið gerðar á mótinu. Englendingar mættu ekki til leiks með karlalið sitt og því eru liðin aðeins þrjú í mótinu. Af þeim sökum var ákveðið að leika tvöfalda umferð þannig að hver þjóð þarf að leika tvo leiki einn daginn. Ísland mætir því Luxembourg síðar í kvöld eða kl. 19.30 á íslenskum tíma. Síðan leikur liðið einn leik á morgun og þann síðasta 29. desember. Sjá má dagskránna á vef körfuknattleikssambands Luxemborgar, basketball.lu eða með að klikka hér. Einnig má sjá öll úrslit leikjanna þar.

Leikur kvennalandsliðsins stendur nú yfir og munu fréttir af honum birtast hér á síðunni síðar í dag.