Jón Arnar Ingvarsson, spilandi þjálfari Breiðabliks í Intersportdeildinnni bætti í gær stoðsendingamet nafna síns Jóns Kr. Gíslasonar og er Jón Arnar nú sá leikmaður sem gefið hefur flestar stoðsendingar í sögu úrvalsdeildarinnar en stoðsendingar voru fyrst teknar saman veturinn 1988 til 1989 sem var einmitt fyrsti vetur Jóns Arnars.

Jón Arnar átti fjórar stoðsendingar í 99-81 tapi gegn KR í DHL-Höllinni og setti metið þegar hann spilaði Mirko Virijevic frían í hraðaupphlaupi þegar 4:38 voru eftir af öðrum leikhluta. Jón Arnar bætti síðan við tveimur stoðsendingum í seinni hálfleik en tíu efstu menn í stoðsendingum í sögu úrvalsdeildar karla má finna hér.

Alls hefur Jón Arnar sent 34 stoðsendingar í vetur og þar með 1362 á ferlinum en farsælan feril hans má finna hér.