Stúdínur urðu í dag fjórða og síðasta liðið til að tryggja sér sæti í undanúrslitum Kjörísbikars kvenna þegar liðið vann tvo örugga sigra á KFÍ á Ísafirði á tveimur dögum. ÍS vann leikina 70-32 og 82-27 og bætist því í hóp Keflavíkur, KR og Grindavíkur sem höfðu áður tryggt sér sæti meðal hinna fjögurra fræknu. Undanúrslitin fara fram 11. desember næstkomandi og úrslitaleikurinn tíu dögum síðar.