Logi Gunnarsson og Helgi Már Magnússon eru tveir leikreyndustu leikmenn íslenska landsliðshópsins þó fyrirliðinn Hlynur Bæringsson komi ekki langt á eftir þeim tveimur.

Ísland spilar sinn fyrsta leik í undankeppni Evrópukeppninnar á sunnudagskvöldið þegar Bretar koma í heimsókn í Laugardalshöllina og þá treystir liðið á reynslu þessara öflugu leikmanna.

Logi og Helgi Már hafa mikla reynslu úr leikjum í Evrópukeppni en þeir hafa báðir rofið 30 leikja múrinn.

Logi hefur spilað 42 landsleiki í Evrópukeppni og Helgi Már, sem kemur nú aftur inn í liðið eftir ársfjarveru, spilaði sinn þrítugasta leik í Evrópukeppni fyrir tveimur árum.

Logi hefur skorað nákvæmlega 400 stig í þessum 42 leikjum sínum í Evrópukeppni eða 9,5 stig að meðaltali í leik.

Helgi Már hefur skorað 175 stig í sínum 30 leikjum í Evrópukeppni sem gera 5,8 stig að meðaltali í leik.

Landsliðsfyrirliðinn Hlynur Bæringsson bætist í 30 leikja hópinn í þessari keppni en að öllu eðlilegu spilar hann sinn þrítugasta leik út í Bosníu í öðrum leik Íslands í undankepppninni.

Flestir leikir í Evrópukeppni í íslenska hópnum 2014:
Logi Gunnarsson 42
Helgi Már Magnússon 30
Hlynur Bæringsson 28
Sigurður Gunnar Þorsteinsson 22
Pavel Ermolinskij 16
Haukur Helgi Pálsson 14
Axel Kárason 14
Sigurður Þorvaldsson 10
Hörður Axel Vilhjálmsson 8