Gunnhildur Gunnarsdóttir og Bryndís Guðmundsdóttir hafa nýtt skotin sín einstaklega vel í Evrópukeppni Smáþjóða í St. Pölten. Gunnhildur er með bestu skotnýtingu allra í mótinu eftir riðlakeppninni auk þess að vera í 2. sæti yfir bestu vítanýtinguna. Bryndís er með bestu tveggja stiga nýtingu allra leikmanna mótsins.

Gunnildur Gunnarsdóttir hefur nýtt 62,5 prósent skota sinna utan af velli (10 af 16) þar af 10 af 13 skotum sínum fyrir innan þriggja stiga línuna. Gunnhildur er síðan með 83,3 prósent vítanýtingu (5 af 6). Gunnhildur hefur skorað 12,5 stig að meðaltali á 17,5 mínútum í leik en hún er að koma sterk inn af bekknum hjá íslenska liðinu.

Bryndís Guðmundsdóttir hefur nýtt 76,9 prósent skota sinna (10 af 13) en hefur ekki tekið nógu mörg skot til þess að komast inn á topplistann yfir bestu skotnýtingu hjá FIBA. Bryndís er aftur á móti með bestu tveggja stiga skotnýtinguna i mótinu ásamt Gunnhildi. Bryndís setti nýtt persónulegt stigamet með landsliðinu þegar hún skoraði 18 stig á móti Gíbraltar.

Helena Sverrisdóttir hefur hitt úr öllum sjö vítum sínum og er efst í vítanýtingu eftir riðlakeppnina en Helena er einnig í 2. sæti í fráköstum (9,0 í leik) og í 3. sæti í stigaskori (18,0 í leik). Helena hefur tekið 5,0 sóknafráköst að meðaltali í leik og það skilar henni í efsta sætið á þeim lista.

Sigrún Ámundadóttir er meðal efstu manna í fráköstum (5. sæti - 7,5 í leik), stoðsendingum (6. sæti - 2,5) og stolnum boltum (3. sæti - 3,0). Gunnhildur og Pálína Gunnlaugsdóttir hafa báðar stolið 3,0 boltum í leik eins og Sigrún.

Íslenska liðið mætir Skotum á morgun í undanúrslitum keppninnar og hefst leikurinn klukkan 14.30 að íslenskum tíma. Það er hægt fylgjast með tölfræðinni á fibaeurope.com og horfa leikinn beint á netinu með því að smella hérna.