Íþróttahúsið í Stykkishólmi verður tíunda húsið á Íslandi til að hýsa kvennalandsleik þegar Ísland mætir þar Danmörku í æfingalandsleik í kvöld. Liðin mættust á Ásvöllum í gærkvöldi en spila sögulegan leik í Hólminum í kvöld.

Stykkishólmur er heimili Íslandsmeistara Snæfells og með íslenska liðinu spila þrír Hólmarar og íslensku stelpurnar ættu því að fá góðan stuðning í kvöld.

Þetta verður líka aðeins í annað skiptið í sögu kvennalandsliðsins sem liðið spilar heimaleik norðan Hvalfjarðar. Eini leikurinn hingað til sem fór ekki fram á suðvestur-horninu var spilaður á Akranesi í árslok 1995.

Eistar komu þá í heimsókn og léku þrjá æfingaleiki hjá bæði karla- og kvennaliðum á milli jóla og nýárs. Tveir þeir fyrstu hjá stelpunum töpuðust stórt í Keflavík og Seljaskóla, sá fyrri með 27 stigum en sá síðari með 33 stigum.

Besti leikur liðsins var sá síðasti á Akranesi sem tapaðist naumlega með tveimur stigum. Anna María Sveinsdóttir var stigahæst hjá islenska liðinu með 20 stig.

Þetta voru fyrstu landsleikir liðsins undir stjórn Sigurðar Ingimundarsonar sem er enn í dag sá þjálfari sem hefur stýrt liðinu í flestum leikjum. Þetta voru líka fyrstu landsleikir Birnu Valgarðsdóttur sem er leikjahæsti leikmaður kvennalandsliðsins.

Heimaleikir kvennalandsliðsins eftir húsum:
Ásvellir 8
Keflavík 6
Smárinn 5
DHL-Höllin 2
Seljaskóli 1
Njarðvík 1
Hagaskóli 1
Grindavík 1
Akranes 1