Ívar Ásgrímsson er tekinn við kvennalandsliðinu í körfubolta á nýjan leik eftir níu ára fjarveru og stýrir liðinu í fyrsta sinn í æfingaleik á Ásvöllum í kvöld. Ísland mætir Dönum í fyrri leik þjóðanna og hefst hann klukkan 19.15

Ívar Ásgrímsson stýrði íslenska liðinu fyrst á árunum 2004 til 2005 en hann tók þá einmitt við liðinu af keflvískum bakverði. Hjörtur Harðarson hafði þjálfað liðið 2003 en að þessu sinni tekur Ívar við liðinu af Sverri Þór Sverrissyni.

Ívar var síðast með kvennalandsliðið á Smáþjóðaleikum í Andorra í júníbyrjun 2005 en í þeim hóp voru fjórir af þeim tólf leikmönnum sem Ívar hefur valið í hópinn að þessu sinni.

Þetta eru þær Hildur Sigurðardóttir, Helena Sverrisdóttir, María Ben Erlingsdóttir og Bryndís Guðmundsdóttir.

Íslenska kvennalandsliðið vann 4 af 6 leikjum sínum á árinu 2005 og fagnaði sigri í 7 af 14 leikjum sínum árið áður. Ívar Ásgrímsson hefur því unnið 11 af 20 leikjum sínum sem þjálfari kvennalandsliðsins.

Íslenska landsliðið mætti Danmörku aðeins einu sinni í þjálfaratíð Ívars fyrir áratug en hann og stelpurnar urðu þá að sætta sig við 68-76 tap á Norðurlandamóti í Arvika í Svíþjóð.