Það voru vinir okkar frá Eistlandi sem eru fyrstir til að tryggja sér sæti á EuroBasket 2015 í Úkraínu eftir samanlagðan sigur á liði Búlgaríu.

Eistar léku með okkur í riðli í fyrrasumar í undankeppni fyrir EuroBasket 2013 þar sem þeir höfnuðu í 4. sæti riðilsins og komust ekki áfram, og léku þar af leiðandi í sumar um sæti eftir 2 ár.

Leikurinn í gær fór fram í SAKU-Arena og voru hvorki fleiri né færri en 7.500 manns mættir í höllina og troðfylltu hana og studdu vel við bakið á sínum mönnum. Eftir að hafa tapað fyrri leiknum í Varna, Búlgaríu, með þremur stigum var ljóst að seinni leikurinn yrði spennandi enda allt undir.

Eistar byrjuð vel og voru 25:10 yfir eftir 1. leikhluta. Bæði lið skoruðu 14 stig í öðrum leikhluta og Búlgarar náðu að vinna þann þriðja með 2 stigum og staðan 50:37 fyrir loka 10 mínúturnar. Eistar tóku síðan völdin í lokaleikhlutanum og náðu 8-2 áhlaupi í byrjun hans og litu aldrei til baka eftir það. Frábær sigur Eista á sterku liði Búlgara og þeir hljóta ríkulega verðlaun fyrir. 13 þjóðir tóku þátt í þessari 1. umferð um eitt laust sæti á EM2015.

Lokatölur í leiknum 61:49 og Eistar unnu einvígið með 9 stigum samanlagt.

Bæði þjálfari Búlgara og leikmenn Eista sögðu eftir leikinn að áhorfendurnir hefðu verið magnaðir og verið 6. 7. og 8. maður Eista í leiknum sem gerði gæfumuninn.

Framundan er svo 2. umferð undankeppni EuroBasket 2015 næsta sumar en Úkraína mun leika á mótinu ásamt Eistum og svo kemur í ljós núna í Slóveníu hvaða lið tryggja sig beint áfram á næsta Evrópumót.

EuroBasket í Slóveníu hefst á miðvikudaginn 4. september og stendur yfir til 22. september.