Ísland tapaði í kvöld gegn sterku liði Búlgaríu í fyrsta leik sínum í undankeppni EuroBasket 2015 í Varna, Búlgaríu.

Eftir jafnræði á fyrstu mínútum leiksins í stöðunni 10-10 tóku Búlgarar völdin og staðan eftir fyrsta leikhluta var 23-13.

Strákarnir okkar áttu ekki sinn besta dag, voru ekki að hitta vel, og Búlgaría tók mikið að fráköstum bæði í sókn og vörn, sem gáfu þeim á endanum 20 stig eftir sóknarfráköst í sókninni. Peter Öqvist sagði eftir leikinn að frákasta baráttan hefði verið dýrkeypt en Búlgaría tók 56 fráköst gegn okkar 22.

Haukur Helgi lenti snemma í villuvandræðum í leiknum og aö auki nýttu andstæðingarnir sínar sóknir vel og hittu mjög vel fyrir utan þriggja stiga línuna, og voru með um 50% nýtingu í hálfleik.

Stigahæstir í íslenska liðinu voru Jakob Örn Sigurðarson með 19 stig, Jón Arnór Stefánsson 13 stig og Hlynur Bæringsson 11 stig.

Næsti leikur verður á miðvikudaginn í Rúmeníu og íslenska liðið er staðráðið í að bæta upp fyrir slæman leik í kvöld og ná í sigur.

Sjá nánar á FIBA Europe (tölfræði, umfjöllun og viðtöl)

Myndir úr leiknum má sjá á Facebook-síðu KKÍ.