Í kvöld verður Sigmundur Már Herbertsson, FIBA dómari, að sinna verkefni fyrir FIBA Europe þegar hann dæmir viðureign í Evrópukeppni félagasliða. Um er að ræða leik milli tveggja sænskra liða, Södertalje Kings og liðs Pavels Ermolinskij, Norrköping Dolphins.

Meðdómarar Sigmunds eru frá Rússlandi og Póllandi og eftirlitsmaður leiksins kemur frá Eistlandi en leikið er í Södertalje sem rétt sunnan við Stokkhólm.

Það er gaman að segja frá því að auk tveggja sænskra liða eru í riðlinum eitt lið frá Lettlandi og annað frá Finnlandi. Það sem er einnig merkilegt er að í alla þessa leiki er styttra að fara fyrir sænsku liðin en í að minnsta kosti tvo leiki í sænsku úrvalsdeildinni.

Norrköping er ekki nema 107 km. frá Södertalje í beinni línu og þá er svipað langt til Tampere í Finnlandi og að fara til Sundsvall. Stutt er svo yfir til Lettlands þar sem BK Ventspils eru, en Ventspils er staðsett vestast í Lettlandi. Lengra er til dæmis að fara í leiki gegn Jamtland og LF Basket (Lulea) en í alla Evrópuleikina.

Leikurinn verður í beinni tölfræðilýsingu á FIBA Europe og hfest kl. 19.00 að sænskum tíma í kvöld.