Dagana 24.-26. maí voru þeir Ágúst Björgvinsson og Pétur Guðmundsson með körfuboltaskóla fyrir unglinga á Tálknafirði, Ísafirði og í Stykkishólmi. Búðirnar tókust mjög vel, en þó
sérstaklega á Tálknafirði og í Stykkishólmi þar sem krakkarnir fylltu húsin. Skólinn verður á Norðurlandi um næstu helgi.

Krakkarnir á Ísafirði voru með hugann við annað laugardaginn sem foreldrarnir voru að kjósa þannig að þátttakan var ekki eins góð og búist hafði verið við. En þeir sem mættu voru fullir af áhuga og var virkilega gaman að vinna með öllum krökkunum sem tóku þátt í námskeiðunum í þessari ferð.

Það komu fram mikið af góðum og efnilegum ungum leikmönnum, bæði stúlkum og drengjum, og verður gaman að fylgjast með framgangi mála á þeim svæðum sem hafa verið heimsótt í þessum
ferðum, en fyrstu helgina fóru Ágúst og Pétur austur og skóluðu stráka á Egilsstöðum.

Næstu helgi, dagana 31. maí og 1. júní verða þeir svo aftur á ferðinni. Að þessu sinni heimsækja þeir eftirfarandi staði:

Á Skagaströnd, föstudaginn 31 maí kl. 14:00-17:00, 10-15 ára.
Krakkar geta skráð sig í íþróttahúsinu.

Á Blöndósi, föstudaginn 31 maí kl. 18:00-20:00. 10-15 ára.
Krakkar geta skráð sig í íþróttahúsinu.

Á Akureyri, laugardaginn 1 júní.
Kl. 10:30-12:00, 8-11 ára.
Kl. 13:00-16:00, 12-16 ára.
Krakkar geta skráð sig fyrirfram hjá Guðmundi Ævari.

Eins og áður verður lögð áhersla á helstu undirstöðuatriði körfuboltans s.s. sendingar, skot og knattrak. Farið verður yfir helstu atriði samspils og mikilvægi þess bæði í vörn og sókn.

Verðlaun verða veitt fyrir ýmsar aldursskiptar þrautir og að lokum fá allir boli merkta skólanum.