Sextán ára lið kvenna tapaði sínum fyrsta leik á NM er þær öttu kappi gegn Svíum.

Niðurstaðan tap 53-66 í leik þar sem Ísland var að spila mjög vel á löngum köflum. Eftir jafna þrjá leikhluta voru það Svíarnir sem reyndust sterkari aðilinn. Okkar stelpur voru ekki langt frá þeim en með smá heppni í skotunum hefðu þær getað spilað jafnari leik alveg fram í lokin.

Tölfræði: Stigahæst hjá Íslandi var Sandra Lind Þrastardóttir með 18 stig og Sara Hinriksdóttir bætti við 17 stigum. Frákastahæst var Sara Rún Hinriksdóttir með 12 fráköst og Sandra Lind Þrastardóttir tók 10.

Þær sænsku voru sterkari í upphafi og virtust ætla að keyra yfir okkar stelpur. En með úrræðagóðum leik þá náðu þær að hægja á Svíunum og vinna sig inní leikinn. Staðan eftir fyrsta leikhluta var 13-16 Svíum í vil.

Elsa Karlsdóttir kom Íslandi yfir í öðum leikhluta þegar hún setti niður laglegt sniðskot eftir flotta hreyfingu á blokkinni. Ísland leiddi í fyrsta sinn í leiknum.

Lokamínútan í öðrum leikhluta var að stefna í einhverja vitleysu hjá Íslandi en Svíarnir voru þá búnir að skora fjögur stig og komast aftur yfir en Sandra Lind Þrastardóttir náði boltanum. Það var brotið á henni og hún setti niður vítaskotin sín og janft í hálfleik 28-28.

Fyrstu fimm mínútur þriðja leikhluta var jafnræði með liðunum og stelpurnar voru að spila skínandi leik. Um miðjan leikhlutann kom slæmur kafli þegar þrír boltar töpuðust á mínútu og Svíarnir refsuðu með sex stigum. Staðan að loknum þriðja var 42-48 og stelpurnar enn inni í leiknum.

Stelpurnar náðu ekki að nálgast Svíana í fjórða leikhluta. Þrátt fyrir hetjulega baráttu þá voru Svíarnir allan tímann með um 10 stiga forskot sem íslensku stelpurnar náðu ekki að nálgast.

Fleiri mínútur en færri voru vel spilaðar hjá Íslandi. Sænska liðið er vel mannað og stelpurnar sýndu flottan leik á löngum köflum.

Niðurstaðan: Mættu mjög sterkum andstæðingi og spiluðu vel á köflum alveg til leiksloka. Miklar framfarir og getan til staðar að spila gegn góðum liðum.

Næsti leikur stelpnanna er gegn Finnlandi á morgun kl. 17.00 að íslenskum tíma.