Laugardaginn 14. janúar, fer fram hinn árlegi Stjörnuleikur karla.

Ákveðið hefur verið að byrjunarliðin tvö í karlaleiknum verði kosin á netinu líkt og á síðasta ári og hefst kosningin fljótlega hér á kki.is.

Þá verður hægt að velja bæði byrjunarliðin en líkt og í fyrra leika lið af höfuðborgarsvæðinu saman undir nafninu „Borgin“ og lið utan af landsbyggðinni undir nafninu „Landið".

Áhugasamir geta þá valið þá fimm sem byrja inná, tvo bakverði, tvo framherja og einn miðherja. Að hámarki má velja tvo útlendinga í hvort byrjunarlið.

Þeir leikmenn sem fá síðan flest atkvæði verða byrjunarliðsmenn í leiknum. Þjálfarar liðanna verða þeir þjálfarar sem verða efstir í deildinni eftir síðustu deildarleiki í Iceland Express-deildinni sem fram fara þann 18. desember og velja þeir hina sjö leikmennina í liðin sín.

Kvennaleikurinn verður svo haldinn síðar en að þessu sinni mun landsliðið undir stjórn Sverris Þórs Sverrissonar nýráðins þjálfara leika við úrval erlendra leikmanna.