Spánverjar eru Evrópumeistarar 2011 eftir sigur á Frakklandi í kvöld í úrslitaleiknum á EM í Litháen.

Leikurinn var frábær skemmtun og jafn framan af, en spænska liðið sýndi svo hverjir eru bestir og sigruðu. Frakkland átti góðan lokasprett í fyrri hálfleik og staðan var 50-41. Í seinni hálfleik sýndu spánverjar kraft sinn og liðsheild þegar þeir sigldu framúr og litu aldrei til baka.

Drifnir áfram af Juan Carlos Navarro, leikmanni Barcelona, sem setti niður stór skot, þá lögðu aðrir sitt á vogarskálarnar og gullið staðreynd, lokatölur 98:85.

Navarro var valinn besti leikmaður mótsins, en hann var með 27 stig og 5 stoðsendingar í leiknum í kvöld. Hjá Frakklandi var Tony Parker allt í öllu, 25 stig og 5 stoðsendingar. Þeir tveir voru báðir í úrvalsliði mótsin, ásamt Pau Gasol í liði meistaranna, Andrei Kirilenko, Rússlandi og Bo McCalebb, Makedóníu.



Rússar höfnuðu í 3. sæti eftir sigur á Makedóníu í leiknum um bronsið. Leikurinn var ótrúlega jafn og Makedónía átti síðasta tækifærið til að jafna en klúðruðu boltanum í opnu færi sem hefði að öllum líkindum tryggt þeim framlengingu.

EM 2011 er þar með lokið og verður ekki sagt annað en að mótið hafi tekist frábærlega, frábær köfubolti var leikinn af bestu leikmönnum Evrópu, og umgjörðin og allt annað hjá körfuboltaóðum Litháeum og FIBA Europe til fyrirmyndar.

Næsta EM2013 verður haldið í Slóveníu.