Lokahóf KKÍ verður haldið á Broadway laugardaginn 30. apríl og þar sem KKÍ er 50 ára á árinu hefur verið ákveðið að skeyta saman afmælis og lokahófi.

Að gefnu tilefni viljum við taka fram að það verður ekki hlaðborð heldur glæsilegur þriggja rétta hátíðarkvöldverður.

Dagskrá verður nokkuð hefðbundin.

Viðurkenningar fyrir Iceland Express deildir verða á sínum stað, heiðursveitingar og dúndur dansleikur þar sem hin frábæra ballhljómsveit Buff mun halda uppi fjörinu fram á nótt.

Nú er ljóst að Svali Björgvinsson verður veislustjóri en hann er þekktur innan körfuboltahreyfingarinnar, verið leikmaður, þjálfari, stjórnarmaður og í seinni tíð lýsandi á Stöð 2 Sport.

Fleira verður gert á hófinu og verður það kynnt til sögunnar á næstu dögum og þá verður einnig búið að opna fyrir miðapantanir.

Heyrst hefur að ýmsir gamlir leikmenn, landsliðsmenn, þjálfarar og áhugamenn ætli að fjölmenna á hátíðina svo það má búast við metþátttöku á þetta lokahóf.

Markmiðið er fá yfir 500 gesti á hófið enda verður allt sem skiptir máli í körfuboltanum fyrr og síðar krufið til mergjar í hverju horni. Það vill enginn missa af því.

Ætlar þú ekki örugglega að mæta?