KR-ingar eignuðust þrjá bikarmeistara hjá yngri flokkum um helgina en í dag lauk seinni degi bikarúrslitanna sem öll fóru fram með viðhöfn á Ásvöllum í Hafnarfirði. Auk KR urðu fjögur önnur félög bikarmeistarar um helgina, Haukar (2), Njarðvík, Fjölnir og Keflavík. Þetta er besti árangur KR-inga í bikarúrslitunum frá upphafi en þeir unnu sigur í unglingaflokki karla á laugardaginn og í dag bættu þeir svo við bikurum í 9. flokki karla og Drengjaflokki.

Birkir Veigarsson og Darri Hilmarsson fengu báðir páskaegg í lok sigurs KR á Snæfelli, 75-30, í 9.flokki karla en þeir voru útnefndir menn leiksins. Birkir gerði 13 stig, tók 8 fráköst og gaf 4 stoðsendingar en Darri hitti úr 6 af 7 skotum sínum, skoraði 12 stig, tók 14 fráköst og gaf 5 stoðsendingar. Þetta var fjórði sigur KR í 9. flokki karla frá upphafi og eru Vesturbæingar sigursælastir frá upphafi í þessum flokki.

Magnús Pálsson leiddi Fjölnir til sigurs í 11. flokki karla og var í lok leiksins valinn maður leiksins. Þetta var þriðja árið í röð sem Fjölnisstrákarnir vinna bikarinn í þessum árgangi, 2000 unnu þeir Grindavík í 9. flokki karla 61-42, í fyrra unnu þeir 10. flokk karla með, 69-66 sigri á Keflavík undir merkjum Vals/Fjölnis og í dag unnu þeir Snæfell, 57-49, í úrslialeik 11. flokks karla. Magnús skoraði 30 stig, tók 15 fráköst og stal 6 boltum í leiknum í dag og er með 23,0 stig, 17,3 fráköst og 4,0 stoðsendingar að meðaltali í þessum þremur úrslitaleikjum.

Jóel Ingi Sæmundsson var hetja KR í drengjaflokki þegar að hann kórónaði góðan leik sinn með því að skora sigurkörfuna gegn Njarðvík 0,8 sekúndum fyrir leikslok en KR vann upp sjö stiga forustu Njarðvíkur í hálfleik, 26-33 og vann 62-60 sigur í æsispennandi og skemmtilegum úrslitaleik. Jóel skoraði alls 19 stig í leiknum og hitti úr 7 af 11 skotum sínum, tróð meðal annars eftiminnilega í fyrri hálfleik og var í leikslok valinn maður leiksins.

María Anna Guðmundsdóttir var valinn maður leiksins í Unglingaflokki kvenna en Keflavík vann flokkinn þriðja árið í röð og hefur María Anna verið með í öll þrjú skiptin. Keflavík hefur unnið 14 bikarmeistaratitla í þessum flokki og alls 20 í kvennaflokki. Keflavík vann Grindavík í úrslitaleik í dag 51-36 en 2000 unnu Keflavíkurstúlkur lið Grindavikur, 46-33 og í fyrra vann Keflavík lið ÍR/Breiðabliks í úrslitaleik, 44-40. María Anna skoraði 13 stig, tók 6 fráköst og stal 5 boltum í leiknum auk þess að skora þrjár þriggja stiga körfur.

Á laugardaginn urðu Haukar tvöfaldir meistarar í 9. flokki kvenna og í 10. flokki kvenna en þá fögnuðu einnig Njarðvíkingar sigri í 10. flokki karla og KR-ingar unnu Unglingaflokk karla.

Bikarmeistarar KKÍ 2002:
Unglingaflokkur karla: KR
Drengjaflokkur: KR
11. flokkur karla: Fjölnir
10. flokkur karla: Njarðvík
9. flokkur karla: KR
Unglingaflokkur kvenna: Keflavík
10. flokkur kvenna: Haukar
9. flokkur kvenna: Haukar

Það má finna allt um sögu bikarúrslitanna hér og hafa úrslit helgarinnar verið uppfærð þar.