Bikarúrslitaleikir karla og kvenna fara fram laugardaginn 9. febrúar í Laugardalshöll.

Kl. 15.00 mætast KR og Njarðvík í kvennaflokki
Kl. 17.00 mætast Njarðvík og KR í karlaflokki.

Kvennaleikinn dæma Rögnvaldur Hreiðarsson og Rúnar Gíslason. Erlingur Snær Erlingsson er eftirlitsdómari.
Karlaleikinn dæma Leifur Garðarsson og Kristinn Óskarsson. Bergur Steingrímsson er eftirlitsdómari.

Fyrst var leikið í hinni eiginlegu bikarkeppni karla árið 1970 og árið 1975 var leikið fyrst í bikarkeppni kvenna. Aðeins einu sinni hefur það gerst áður að sömu lið hafi leikið í úrslitum í karla og kvennaflokki. Það gerðist árið 1997 er Keflavík mætti KR í bæði karla og kvennaflokki. Keflavík sigraði í báðum leikjunum 77-66 hjá körlum og 66-63 í kvennaflokki eftir að staðan hafði verið jöfn 59-59 eftir venjulegan leiktíma

Karlalið KR og Njarðvíkur eru mikil bikarlið og hafa unnið titilinn oftast allra liða.

KR-ingar hafa sigrað 9 sinnum í bikarkeppni karla, síðast árið 1991. Þeir hafa leikið 15 sinnum til úrslita.
Njarðvíkingar hafa sigrað 6 sinnum í bikarkeppni karla og leikið til úrslita 12 sinnum. Síðast unnu þeir bikarinn 1999. Njarðvíkingar töpuðu 5 fyrstu úrslitaleikjunum sem þeir tóku þátt í, unnu svo fjóra næstu.

Í kvennaflokki hefur KR sigrað 8 sinnum og leikið 13 sinnum til úrslita. Aðeins Keflavík hefur unnið fleiri titla eða 9.
Njarðvík hefur aldrei sigrað í bikarkeppni kvenna og aðeins leikið tvisvar til úrslita, 1983 gegn KR og 1996 gegn Keflavík.

Bæði kvennaliðin hafa fengið til liðs við sig erlendan leikmann. Hjá Njarðvík leikur Ebony Dickinson sem lék áður með KFÍ við góðan orðstý. Hún hefur leikið einn leik með Njarðvík. Hjá KR leikur Carrie Coffman og hefur hún leikið 3 leiki með KR auk undanúrslitaleiks í bikarkeppninni.

Samanburður á tölfræði liðanna í bikarúrslium 2002