Bandaríkin · Rússland
Fyrri viðureign dagsins er stórleikur Bandaríkjanna og Rússlands. Þessi tvö körfubolta stórveldi hafa marga hildina háð í gegnum tíðina, þá áður þegar Sovétríkin sálugu voru til. Báðar þessar þjóðir hafa sigrað þrisvar sinnum á HM í sögunni og hafa mikla körfuboltasögu.

Einn sögulegasti leikur þessara liða var án efa úrslitaleikur Ólympíuleikanna 1972 þar sem ótrúlega umdeilt atvik átti sér stað í lok leiksins. Í stuttu máli varð uppi reikistefna um hvort Sovétríkin hefðu beðið um leikhlé eftir að Bandaríkin komust yfir eftir tvö vítaskot. Síðustu þrjár sekúndurnar voru leiknar í tvígang og í síðara skiptið náðu Sovétríkin að skora og tryggja sér sigur á ótrúlegan hátt. Áður hafði leikurinn verið flautaður af og Bandaríska liðið fagnað sigri.

Það varð til þess að reglur voru endurskoðaðar til að koma í veg fyrir svipuð atvik. Bandaríska liðið mætti ekki á veðrlaunaafhendingu leikanna og enginn leikmaður hefur tekið við silfurverðlaunapeningum sínum fyrir annað sætið enn þann dag í dag. Hægt er að skoða málið nánar og lesa ýtarlega lýsingu á vef Wikipedia og sjá myndskeið af atvikinu með viðtölum á Youtube.

Argentína · Litháen
Síðari leikur dagsins eru annar stórleikur körfuknattleiksþjóða en Argentínumenn mæta hinu taplausa og endurnýjaða liði Litháa kl. 18.00. Litháar sem munu leika á heimavelli að ári á EM hafa komið á óvart og eiga möguleika á að fara í undanúrslit. Þeir þurfa fyrst að finna leið til að stöðva þá Luis Scola og Carlos Delfino sem hafa verið óstöðvandi.

Hægt er að horfa á leikina á FIBA TV og einnig eru þeir sýndir á ýmsum Sport Börum hér á landi en því miður er Ísland eina landið í Evrópu sem sýnir ekki frá HM í Körfubolta.