Um næstu helgi 14.-16. maí nk. mun fara fram hið árlega þing evrópska körfuknattleikssambandins FIBA Europe.

Á þessu þingi verður kosið um nýjan forseta sambandsins til næstu fjögurra ára og mun þar okkar fulltrúi Ólafur Rafnsson forseti ÍSÍ, fv. formaður KKÍ og núverandi stjórnarmaður í FIBA Europe vera í kjöri til forseta sambandsins ásamt Turgay Demirel frá Tyrklandi.

Það er 51 þjóð innan FIBA Europe og fer hver þjóð með eitt atkvæði. Kosningin fer fram laugardaginn 15. maí og má búast við því að niðurstaða liggi fyrir seinnipartinn þann dag.

FIBA Europe er eitt af fimm svæðasamböndum körfuknattleiks í heiminum og ber ábyrgð á þróun körfuknattleiksíþróttarinnar í Evrópu auk þess að fara með yfirstjórn allra körfuknattleiksmála í álfunni.

FIBA Europe er því eitt af stærri álfusamböndum innan íþróttahreyfingarinnar og því yrði það mikill sigur fyrir Ólaf og Ísland nái hann kjöri sem forseti sambandsins, enginn Íslendingur hefur tekið að sér forystu í jafn stóru alþjóðlegu sambandi innan íþróttahreyfingarinnar.

Ólafur hefur ásamt KKÍ unnið vel að framboðinu síðustu mánuði og hefur Ólafur m.a heimsótt þó nokkuð margar þjóðir til að koma stefnumálum sínum á framfæri.

Hægt er að kynna sér stefnumál Ólafs á heimasíðunni Rafnsson.is en þar er að finna ítarlegan bækling um framboð Ólafs.