Ríkharður Hrafnkelsson, mótastjóri golfmóts Körfuboltamanna, hefur hafið undirbúning að mótinu í sumar og hefur tryggt sér völlinn í Hólminum fyrir hið árlega golfmót körfuboltamanna

Mótið fer fram föstudaginn 18. júni á Víkurvelli í Stykkishólmi og verður ræst út af öllum teigum kl. 14:30.

Síðastliðið haust voru teknar í notkun nýjar holur og endurbættur völlur í Stykkishólmi sem verður afar spennandi að leika. Þetta verður í þrettánda sinn sem mótið fer fram, en mótið var fyrst haldið í Hólminum árið 1998.

Á mótið eiga erindi allir þeir sem einhvern tíma hafa komið nálægt körfubolta, sem leikmenn, dómarar, stjórnarmenn eða á einhvern annan hátt og eru að fikta við golfið. Makar eru að sjálfsögðu einnig velkomnir.

Leiknar verða 18 holu punktakeppnir, bæði með og án forgjafar, þar sem hámarksforgjöf verður 24 hjá körlum og 28 hjá konum.

Skráning og nánari upplýsingar er hjá Ríkharði Hrafnkelssyni í síma 897-6279 eða á tölvupóstfangi: rikkihr@visir.is.

Mótið í fyrra var vel sótt og stórskemmtilegt, en þá var leikið að Flúðum og voru rúmlega 60 manns skráðir til leiks. KKÍ hvetur alla sem áhuga hafa til að skrá sig og eiga góðan dag í góðra manna hópi þann 18. júní.