Í nótt fór fram hinn árlegi Stjörnuleikur NBA. Í þetta sinn var hann í Dallas, Texas að viðstöddum 108.713 manns sem er áhorfendamet á körfuboltaleik en leikvangi Dallas Cowboys í Ameríska fótboltanum var breytt fyrir þennan viðburð.

Til að tryggja að ekkert færi fram hjá neinum var 50x22 metra stór sjónvarpsskjár fyrir ofan völlinn sem er álíka stór og 2 körfuboltavellir.

Yfir helgina voru stanslausar uppákomur. Sjálfur Stjörnuleikurinn var í nótt og endaði leikurinn 141:139 fyrir Austurströndinni. Dwayne Wade, Miami Heat, var valinn MVP, eða maður leiksins.

Á laugardeginum var keppt í hefðbundnum greinum Stjörnuleikshelgarinnar að venju. Hinn 175 cm hái Nate Robinsson, NY Knicks, vann troðslukeppnina kvöldið áður og það í þriðja sinn sem er met. Paul Pierce, Boston Celtics, sigraði í þriggjastiga-skotkeppninni og Steve Nash, Phoenix Suns, vann þrautabrautina.

Lið Texas sigraði svo í keppninni "Shooting Stars" en það skipuðu þau Dirk Nowitzki, Becky Hammon og Kenny Smith. Liðin eru samsett af karli og konu úr NBA og WNBA ásamt einni gamalli kempu. Þau lögðu lið Los Angeles í úrslitum en það skipuðu þau Pau Gasol, Marie Ferdinand-Harris og Brent Barry.

Hægt er að sjá tilþrif úr öllum keppnum hérna á NBA.com.