Grindavíkurstúlkur tryggðu sér í dag sigur í Kjörísbikar kvenna með því að vinna Keflavík örugglega, 82-58 í úrslitaleik í Hveragerði.

Sólveig Gunnlaugsdóttir skoraði 34 stig fyrir Grindavík þar af gerði hún 23 í fyrri hálfleik og alls sex þriggja stiga körfur. Jessica Gaspar var með þrefalda tvennu í leiknum, skoraði 16 stig (13 í seinni hálfleik), tók 16 fráköst (7 í seinni hálfleik), átti 11 stoðsendingar (9 í seinni hálfleik) auk þess að stela 7 boltum af Keflavíkurliðinu sem alls tapaði 26 boltum í leiknum. Birna Valgarðsdóttir skoraði 25 stig fyrir Keflavík.

Liðin höfðu tryggt sér sætin í úrslitaleiknum í gær, Keflavík vann KFÍ í spennandi leik, 60-56, og Grindavík endaði sigurgöngu KR-kvenna í Kjörísbikarkeppninni með 61-73 sigri.