Félagarnir Valtýr Björn Valtýsson og Svali Björgvinsson munu stýra hinu stjörnum prýdda úrvalsliði KKÍ sem mun etja kappi við sterkt lið sem skipað er margreyndum landsliðsmönnum frá fyrri tíð.

Þeirra bíður krefjandi verkefni þar sem vitað er að stjörnurnar eru með mikið egó og erfitt verður fyrir þá að fá þá sem eru inn á hverju sinni til að skipta út af.

Svali er þekktur í faginu og mun sjálfsagt beita ýmsum sálfræðibrellum til að knýja fram sigur. Svali lét hafa eftir sér að ef svo ólíklega vildi til að gömlu karlarnir myndu jafna í lokin og hans lið væri á vítalínunni þá myndi hann koma inn á til að taka vítið til að tryggja sínu liði verðskuldaðan sigur.

Valtýr er þekktur fyrir hörku þannig að hann mun leysa þetta verkefni af stakri snilld. Innsæi hans í NBA körfuboltann sem og íþróttum almennt mun án efa koma honum vel í þessarri baráttu.