Breiðablik sigraði ÍR í framlengdum leik í kvöld í Smáranum með 95 stigum gegn 91. Eftir venjulegan leiktíma var staðan 82 stig gegn 82. Valsmenn sigruðu HK með 84 stigum gegn 63 og Reynir Sandgerði sigraði lið ÍFL örugglega með 124 stigum gegn 65.

Leikur Breiðabliks og ÍR var jafn og spennandi allan tímann og munaði aldrei meira en 4 - 6 stigum á liðunum í síðari hálfleik. Breiðablik var þó með frumkvæðið og leiddi í hálfleik með 41 stigi gegn 37.
Lokamínútur leiksins voru æsispennandi og þegar 5 sekúndur voru til leiksloka og staðan 80 - 82 fyrir ÍR fékk Þórólfur Þorsteinsson tvö vítaskot til að jafna leikinn. Hann klikkaði á báðum skotunum en Keneth Richards tók sóknarfrákastið. Brotið var á honum og fékk hann tvö skot til að jafna og innan við þrjár sekúndur eftir af leiknum. Það tókst hjá honum, en þó ekki fyrr en í fjórðu tilraun því tvisvar fóru ÍR-ingar of snemma inn í teiginn. ÍR-ingar tóku boltan inn og í þann mund sem leikklukkann gall skoraði Eiríkur Önundarson þriggja stiga körfu vel fyrir utan þriggja stiga línuna sem ekki var dæmd góð og framlenging staðreind.
Í framlengingunni byrjuðu ÍR-ingar betur og gerðu þrjú fyrstu stigin en Blikar reyndust sterkari í blálokin og tryggðu sér þátttökurétt í 16 liða úrslitum í bikarkeppni KKÍ og Doritos.