Ender Arslan jafnaði leikinn fyrir Tyrkland með því að brjótast í gegnum vörn Grikkja og tryggði sínu liði framlengingu um leið og tíminn rann út. Hann klikkaði hinsvegar á þriggjastiga skoti sem hefði sent Tyrkland áfram í undanúrslitin í framlengingunni.

Það gekk mikið á í kvöld í lokaleikjunum tveim í 8-liða úrslitum Evrópukeppninnar í Póllandi. Fyrri leikur dagsins var æsispennandi og fór í framlengingu milli Tyrklands og Grikklands. Þar reyndust Grikkir hlutskarpari að lokum en Tyrkir hefðu getað stolið sigrinum þar sem þeir áttu síðasta skotið fyrir utan þriggjastigalínuna. Leikurinn fór 76:74.

Í hinum leik kvöldsins sýndu Slóvenar úr hverju þeir eru gerðir eftir að hafa verið undir 15 stigum í seint í fyrri hálfleik. Þeir komu til baka og unnu tveggja stiga sigur á Króötum, 67:65, og fara því í undanúrslitin sem fara fram á morgun, laugardag, og tryggðu sér sæti á HM í Tyrklandi næsta haust.

Jafnframt verður leikið um hvaða lið leika um sæti 5-6 sem gefa sæti á HM að ári á morgun og á sunnudaginn eru svo lokaleikirnir í keppninni.

· 4-liða úrslitin ·
Spánn · Grikkland
Serbía · Slóvenía

· Fyrstu leikir um 5.-8. sæti ·
Frakkland · Tyrkland
Rússland · Króatía