Laugardagurinn 29. ágúst verður stór dagur í sögu KKÍ en þá fara fram tveir landsleikir sama daginn í Evrópukeppni landsliða en það hefur aldrei áður gerst.

14:00 Ísland – Svartfjallaland ( Kvennaleikur )

16:30 Ísland – Austurríki ( Karlaleikur )


Sérstakir heiðursgestir verða á leikjunum:

16. maí sl. voru nákvæmlega 50 ár liðin frá fyrsta landsleik Íslands í körfuknattleik sem leikinn var gegn Dönum ytra.

Af því tilefni hefur stjórn KKÍ ákveðið að bjóða þeim sem skipuðu hópinn í hátíðarmálsverð fyrir leikina og einnig verða þeir heiðraðir sérstaklega í hálfleik á karlaleiknum.

Flestir úr hópnum sem eru á lífi hafa boðað komu sína en nokkrir eru búsettir erlendis. Fjórir úr hópnum eru látnir.

Heiðurskrosshafar KKÍ, þeir Einar Ólafsson og Einar Bollason er einnig boðið sem og eini körfuknattleiksmaðurinn sem hefur verið kosinn íþróttamaður ársins, Kolbeinn Pálsson en Kolbeinn var kosinn íþróttamaður ársins 1966.