Stjórn Körfuknattleikssambands Íslands hefur nú boðað til þings sambandsins 15.-16. maí næstkomandi. Þingið verður haldið í Smáranum í Kópavogi.

Bréf hafa verið póstlögð til allra héraðssambanda og tölvupóstur sendur til allra aðildarfélaga KKÍ.

Hér fyrir neðan er hægt að sjá 5.gr laga KKÍ sem varðar boðun þings. Einnig þar brot úr 9.gr laga KKÍ er varðar kjör til stjórnar og varastjórnar, en einstaklingar þurfa að tilkynna um framboð með minnst 10 daga fyrirvara.

Nánari dagskrá og kjörbréf verða send út þegar nær dregur þingi.

Fyrir hönd Körfuknattleikssambands Íslands,

Hannes S. Jónsson · Formaður KKÍ
Friðrik Ingi Rúnarsson · Framkvæmdastjóri KKÍ

------------------

· Körfuknattleiksþingið ·

5. grein
Körfuknattleiksþingið fer með æðsta vald á málefnum KKÍ. Þingið sitja fulltrúar frá þeim aðilum sem mynda KKÍ. Fulltrúafjöldi hvers aðila fer eftir tölu virkra körfuknattleiksiðkenda og skal miðað við kennsluskýrslur hverju sinni þannig að fyrir allt að 50 iðkendur koma 2 fulltrúar og síðan 1 fyrir hverja 50 eða brot úr 50 framyfir það.

Þingið skal halda annað hvert ár (frá og með 2007) eigi síðar en í maímánuði. Stjórn KKÍ skal boða bréflega til þingsins með minnst sex (6) vikna fyrirvara. Málefni, sem sambandsaðilar óska að tekin verði fyrir á þinginu, skulu tilkynnt stjórn KKÍ minnst 21 degi fyrir þing. Þá skal stjórn KKÍ kynna sambandsaðilum dagskrá þingsins ásamt ársskýrslu stjórnar í síðasta lagi 2 vikum fyrir þing.

Körfuknattleiksþingið er lögmætt, ef löglega hefur verið til þess boðað.

úr 9. grein
......“Þeir sem hyggjast gefa kost á sér til setu í stjórn KKÍ eða varastjórn skulu tilkynna það til stjórnar KKÍ ekki síðar en 10 dögum fyrir ársþing. Berist ekki framboð fyrir þann tíma skal stjórn KKÍ hlutast til um tilnefningu aðila til stjórnarkjörs á ársþingi.”.....