Í kvöld eru nokkri leikir 1. deild karla í næstsíðustu umferð deildarinnar og mikil spenna og barátta framundan um sæti í úrslitakeppninni og tilverurétt í deildinni að auki. KFÍ menn senda beint út að vanda frá Ísafirði og við hvetjum alla til að fylgjast með þeim leik sem verður án efa hörkuskemmtilegur.

Allir leikir kvöldins eru gríðarlega mikilvægir. Baráttan um 5. sætið og síðasta sætið í úrslitakeppninni er á milli Þórs Þorlákshafnar og Fjölnis sem mætast í kvöld kl 19.15 í Þorlákshöfn. Þór er með 18 stig í 6. sæti og Fjölnir með 20 stig í 5. sæti.

KFÍ eru í 4. sæti og fá Hauka í heimsókn vestur í kvöld. Haukar freista þess að vinna síðustu tvo leiki sína og treysta á að Hamar tapi sínum tveim. Þó Haukar geti jafnað Hamar að stigum er nettóstigamunurinn líklega of mikill til að þeir fari uppfyrir Hamarsmenn, en bæði lið unnu sitthvorn leikinn með 4 stigum. KFÍ er með 20 stig líkt og Fjölnir og eru því bæði lið aðeins 2 stigum á eftir Val sem situr í 3. sætinu.

Valur fær topplið Hamars í heimsókn á Hlíðarenda. Hamar getur með sigri endanlega tryggt sér sæti í Iceland Express-deildinni að ári. Valsmenn stefna að því að tryggja sér heimaleikjaréttinn með þvi að ná Haukum að stigum tapi þeir á Ísafirði.

Á morgun laugardag eigast svo við Í Kennaraháskólanum Ármann og Höttur en sá leikur hefst kl 14.00.

Það er því ljóst að það á ýmislegt eftir að skýrast í síðustu tveim umferðunum í deildinni.