Njarðvíkingar eru hraðmótsmeistarar Vals 2001, en Íslandsmeistararnir unnu Stjörnuna í úrslitaleik mótsins 81-56. Brenton Birmingham tók við glæsilegum farandbikar úr hendi Sam Jones, fyrrum leikmanns Boston Celtics, eftir úrslitaleikinn í gærkvöld.

Njarðvíkingar unnu alla sína leiki í mótinu að þessu sinni og voru gríðarlega sterkir. Stjarnan vann alla sína leiki nema einn í sínum riðli og kom verulega á óvart. Öll úrslit leikja á hraðmóti Vals eru hér.Fróðlegt verður að fylgjast með Íslandsmótinu í vetur og hvort Njarðvíkingar vinna fleiri titla, en liðið er allt annað en árennilegt.

Athygli vakti að NBA-stjarnan Sam Jones var einn á ferð, en félagar hans þeir George Gervin og Rick Barry létu ekki sjá sig. Jones þótti einkar viðfelldinn náungi og létu þeir sem kynntust honum um helgina vel að kynnum sínum við hann. Ísmaðurinn Gervin á hins vegar enn eftir að sækja Ísland heim og ekki væri gott afspurnar fyrir hann að fá mikla umfjöllun um skróp sitt í blöðum þar vestra. Þá gætu blöðin birt grein um Gervin undir fyrirsögninni "Ice Man no show in Iceland" eða "Iceland to cold for the Ice Man?"