Þrír leikmenn sem gerðu garðinn frægan í NBA-deildinni hér á árum áður eru væntanlegir til landsins um helgina. Þetta eru þeir George Gervin (The Ice Man) San Antonio Spurs, Sam Jones Boston Celtics og Rick Barry Golden State Warriors. Þessir kappar munu meðal annars líta inn á Hraðmót Vals á sunnudaginn.

Það eru Flugleiðir (Icelandair) sem standa að komu þessara kappa til landsins. Þeir munu meðal annars spila golf og fara á hestbak hjá Einari Bollasyni í Íshestum.

Kapparnir koma til landsins á sunnudagsmorgun og munu síðar um daginn, nánar tiltekið kl. 15:00, mæta í Valsheimilið að Hlíðarenda og fylgjast með leik Grindavíkur og Tindastóls.

Þessir snillingar voru allir í hópi bestu leikmanna NBA-deildarinnar á sjöunda, áttunda og níunda áratugnum. Gervin var stigakóngur deildarinnar hvað eftir annað á níunda áratugnum og allir voru þeir ítrekað valdir í stjörnulið deildarinnar. Þeir Gervin, Jones og Barry voru allir í hópi 50 bestu leikmanna NBA-deildarinnar sem valdir voru árið 1997.