Eftir tap íslenska landsliðsins gegn því svissneska, 62-79, í Njarðvík í gær er ljóst að Svisslendingar eru komnir áfram í undanúrslitakeppni Evrópumótsins. Írar fylgja þeim upp úr riðlinum eftir sigur á Finnum í Helsinki í gær, 81-84. Þessi úrslit koma mjög á óvart og endurspegla hvað þessi riðill var í raun sterkur.

Leikurinn gegn Svisslendingum var ekki vel leikinn að hálfu íslenska liðsins, sem t.d. gerði aðeins 11 stig í fyrsta fjórðungi. Í lok þriðja leikhluta náði íslenska liðið aðeins að velgja Svisslendingum undir uggum með því að minnka muninn í 12 stig, en gestirnir svöruðu fyrir sig og bættu í undir lokin og unnu öruggan sigur.

Logi Gunnarsson var stigahæstur í íslenska liðinu með 24 stig, (9-8, 6-1 og 6-5 í skotum, 4 fráköst, 3 stolnir og 2 varin), og þeir Friðrik Stefánsson (6 fráköst og 2 varin) og Helgi Jónas Guðfinnsson (3-1, 5-2, 2-2 í skotum) komu næstir með 10 stig hvor.

Síðasti leikur Íslands í riðlinum verður gegn Írum á laugardaginn kemur kl. 16:30 í Njarðvík.