Lið Iceland Express vann Stjörnuleik karla í ár en þeir höfðu betur í jöfnum og spennandi leik 111-113.

Leikmenn sýndu sínar bestu hliðar í dag og voru troðslurnar svo margar að skörpustu menn áttu í vandræðum með að telja þær.

Það var frábær þriðji leikhluti sem lagði grunninn að sigri Iceland Express-liðsins en þeir unnu hann 17-35 eftir að hafa verið undir í hálfleik 62-47.

Í lokin voru það vítaskot frá yngsta manni vallarins, Hauk Helga Pálssyni, sem reyndist vera munurinn á liðunum en hann jók muninn í fjögur stig 109-113 þegar 5 sekúndur voru eftir. Páll Axel Vilbergsson setti tvö víti í endann og minnkaði muninn en nær komst Ísland ekki að sinni og úrvalsliðið vann.

Það má segja að Jason Dourisseau hafi verið maður dagsins en ásamt því að vinna troðslukeppnina var hann einnig valinn besti maður Stjörnuleiksins en hann fór á kostum í leiknum. Skoraði 36 stig, tók 10 fráköst, gaf 4 stoðsendingar og stal 2 boltum.