Hugmyndin er að setja saman pistla um nokkra frábæra leikmenn úr sögunni og birta hér á heimasíðunni á næstunni. Vonandi að einhverjir hafi gaman af.

Það er alltaf gaman og nauðsynlegt að rifja upp það sem liðið er. Hér að neðan má lesa smá fróðleik og sjá nokkur skemmtileg myndbrot með Drazen Petrovic sem lést fyrir aldur fram einungis 28 ára gamall en Petrovic er talinn einn allra besti leikmaður sem komið hefur frá Evrópu.

Drazen Petrovic sem fæddist í Króatíu lét snemma finna fyrir sér í evrópskum körfubolta og bar fljótlega höfuð og herðar yfir aðra leikmenn. Hann lék með hinum ýmsu félögum í Evrópu sem og landsliðum Júgoslavíu og síðar Króatíu. Hann afrekaði það m.a. að skora 112 stig í einum og sama leiknum á ferlinum. Nokkrum sinnum skoraði hann yfir 40 stig, 50 stig og jafnvel 60 stig í leikjum þar sem allt var undir. Fæddur skorari.

Petrovic var valinn af Portland Trailblazers í NBA deildinni árið 1986 en hann ákvað að fara ekki og gerði samning við Real Madrid í spönsku deildinni. Þar lék hann í eitt ár eða þar til að hann lét undan og fór til Portland.

Hann lék ekki mikið þar sem fyrir voru leikmenn á borð við Clyde Drexler og Terry Porter. Í upphafi leiktímabils númer tvö hjá Portland var spilatími hans kominn niður í 7 mín á leik og ljóst að hann var ekki mikið í plönum forráðamanna liðsins. Það kom sér því vel þegar honum var skipt til New Jersey Nets þar sem hann átti heldur betur eftir að blómstra.

Sumarið 1992 lék íslenska landsliðið við það króatíska og var Drazen Petrovic leiðtogi síns landsliðs en samherjar hans voru ekki af verri endanum, leikmenn á borð við Dino Radja og Toni Kukoc svo einhverjir séu nefndir. Leikmenn Íslands sögðu eftir leikinn að erfitt hefði verið að leika gegn þessum mikla skorara, hann var slóttugur og brögðóttur og komst þangað sem hann ætlaði sér. Króatía endaði þetta sumar með því að leika til úrslita um Olympíugullið við Draumaliðið í Barcelona. Bird, Magic og Jordan reyndust of stór biti þar eins og frægt er.

Besta tímabilið hans hjá Nets var 1992-1993 er hann skoraði að meðaltali 22 stig á leik. Því miður var þetta síðasta tímaibil Drazen Petrovic því hann lést aðeins 28 ára gamall sumarið 1993 í bílslysi á leið sinni til Póllands þar sem króatíska landsliðið var að undirbúa sig fyrir Evrópukeppnina þá um sumarið.


Hér má sjá Petrovic í leik leika listir sínar.

Hér má sjá kappann í leik gegn Real Madrid þar sem mhann skoraði 49 stig.

Einvígi Petrovic og Oscars Schmidt brasilíska snillingsins sem við gerum skil á næstunni m.a.