Íslenska karlalandsliðið leikur í kvöld sinn fyrsta leik í Evrópukeppninni þegar Danir mæta í Laugardalshöllina en leikurinn hefst klukkan 20.45. Nú er að sjá hvort glæsileg sigurganga karlaliðsins frá síðasta hausti hjálpi strákunum við að yfirvinna byrjunarerfiðleikana sem hafa einkennt fyrsta leik liðsins síðustu fjögur ár en þar hefur liðið byrjað haustið á tapleikjum á móti Dönum (2004 og 2005) og Finnum (2006 og 2007).

Íslenska karlalandsliðið endaði síðustu Evrópukeppni á frábæran hátt en liðið vann þá þrjá síðustu leiki sína og tryggði sér með því þriðja sætið í riðlinum á undan Austurríki og Lúxemborg. Íslenska liðið vann fyrst eins stigs sigur á Georgíu í Laugardalshöllinni þar sem Jakob Örn Sigurðarson skoraði sigurkörfuna og strákarnir fylgdu því síðan eftir með 16 stiga sigri á Lúxemborg á útivelli. Liðið vann að lokum sannfærandi 14 stiga sigur á Austurríkismönnum þar sem Jakob Sigurðarson átti stórleik og var með 21 stig, 10 stoðsendingar og 7 fráköst.

Íslenska liðinu hefur ekki gengið vel í fyrsta leik sínum í Evrópukeppninni síðustu fjögur haust og opnunarleikirnir hafa allir tapast. Íslenska liðið hefur aftur á móti unnið 3 af 4 leikjum númer tvö þar sem eina tapið kom út í Georgíu. Ísland tapaði fyrir Finnlandi síðustu tvö ár, á heimavelli 2006 og á útivelli í fyrra en hafði tapað fyrir Dönum tvö síðustu ár þar á undan. Það er reyndar athyglisvert að íslenska liðið hefur unnið fyrsta leikhlutann í 3 af þessum 4 leikjum og það með samtals 26 stigum.

Síðustu þrír sigurleikir karlalandsliðsins í Evrópukeppninni:

29. ágúst 2007 Laugardalshöllin:
Ísland-Georgía 76-75 (18-23, 18-15, 16-17, 24-20)
Flest stig: Logi Gunnarsson 17, Jakob Sigurðarson 16, Brenton Birmingham 13
Flest fráköst: Páll Axel Vilbergsson 15, Brenton 11
Flestar stoðsendingar: Jakob 5, Brenton 4, Logi 3
Hæsta framlag: Páll Axel 20, Brenton 16, Logi 14, Jakob 11

1. september 2007 Lúxemborg:
Lúxemborg-Ísland 73-89 (25-15, 24-21, 14-31, 10-22)
Flest stig: Logi 21, Fannar Ólafsson 15, Páll Axel 15, Magnús Þór Gunnarsson 12
Flest fráköst: Fannar 9, Páll Axel 8, Friðrik Stefánsson 7
Flestar stoðsendingar: Helgi Már Magnússon 3, Magnús Þór 3, Friðrik 2, Jakob 2
Hæsta framlag: Fannar 18, Páll Axel 16, Logi 14, Magnús Þór 13

5. september 2007 Laugardalshöllin:
Ísland-Austurríki 91-77 (13-23, 26-18, 23-16, 29-20)
Flest stig: Jakob 21, Páll Axel 13, Fannar 12, Helgi Már 11, Logi 10
Flest fráköst: Fannar 8, Jakob 7, Friðrik 7, Brenton 7
Flestar stoðsendingar: Jakob 10, Páll Axel 3, Friðrik 3
Hæsta framlag: Jakob 34, Fannar 16, Friðrik 14, Páll Axel 13, Helgi Már 13


Fyrsti leikur karlalandsliðsins í Evrópukeppninni síðustu ár:
10.september 2004 (Árósir) Danmörk-Ísland 81-71 (17-26, 25-14, 19-19, 20-12)
3.september 2005 (Keflavík) Ísland-Danmörk 60-77 (19-12, 13-19, 16-16, 12-30)
6. september 2006 (Laugardalshöll) Ísland-Finnland 86-93 (31-21, 26-25, 10-25, 19-22)
25. ágúst 2007 (Vantaa)Finnland-Ísland 85-66 (22-15, 22-17, 17-21, 24-13)