María Ben Erlingsdóttir lék sinn síðasta landsleik í ár þegar A-landslið kvenna lék á móti Slóveníu á Ásvöllum á miðvikudaginn. María þurfti að fara til Bandaríkjanna þar sem hún er við nám við University of Texas–Pan American. María Ben flaug til Bandaríkjanna um leið og íslenska liðið flaug til Írlands. Hamarskonan Fanney Lind Guðmundsdóttir kemur inn í liðið fyrir Maríu og mun spila í númer fimmtán í útileikjunum á móti Írlandi og Svartfjallalandi.

María Ben hefur verið vaxandi í öllum leikjum íslenska liðsins í Evrópukeppnini og hefur hækkaði sig bæði í stigum og mínútum í hverjum leik. María Ben er með 5,0 stig og 3,0 fráköst að meðaltali á 21,3 mínútu í fyrstu þremur leikjum íslenska liðsins.

María Ben hefur alls leikið 23 leiki með A-landsliði kvenna og hefur skorað 78 stig í þeim. María Ben missti af þremur leikjum íslenska liðsins í fyrra vegna skólans og missir af öðrum tveimur í ár en hún fékk sérstakt leyfi frá University of Texas–Pan American til þess að spila í leikjunum á móti Sviss, Hollandi og Slóveníu.

Það verður spennandi að fylgjast með Maríu Ben á sínu öðrum ári í bandaríska háskólaboltanum. Hún var óheppin með meiðsli með University of Texas–Pan American á síðasta tímabili og náði því aðeins að leika 17 leiki með liðinu. María Ben skoraði 4,1 stig á 14,7 mínútum í þessum 17 leikjum en í sjö þeirra var hún í byrjunarliðinu.

Íslenska liðið gegn Írlandi í Dublin:
4 Signý Hermannsdóttir, Val
5 Petrúnella Skúladóttir, Grindavík
6 Ragna Margrét Brynjarsdóttir, Haukum
7 Jovana Lilja Stefánsdóttir, Grindavík
8 Ingibjörg Jakobsdóttir, Grindavík
9 Helga Einarsdóttir, KR
10 Hildur Sigurðardóttir, KR
11 Pálína Gunnlaugsdóttir, Keflavík
12 Sigrún Sjöfn Ámundadóttir, KR
13 Kristrún Sigurjónsdóttir, Haukum
14 Helena Sverrisdóttir, Haukum/TCU
15 Fanney Lind Guðmundsdóttir, Hamri

Þjálfari: Ágúst Björgvinsson
Aðstoðarþjálfari: Finnur Freyr Stefánsson
Sjúkraþjálfari: Björg Hafsteinsdóttir
Fararstjóri: Hannes S. Jónsson