Rögnvaldur Hreiðarsson dæmdi í kvöld æsispennandi leik heimamanna Dana og Svía á Norðurlandamóti kvenna í Gentofte. Hann var þar með fyrstur í íslenska hópnum til að hefja leik á mótinu en íslenska liðið spilar sinn fyrsta leik ekki fyrr en á morgun.

Danir komu mörgum á óvart með því að leggja Svía að velli í þessum stórskemmtilega leik en Svíar unnu æfingaleik þjóðanna með 30 stigum fyrir aðeins nokkrum dögum. Danir tryggðu sér sigur þremur sekúndum fyrir leikslok eftir að hafa náð sóknarfrákasti eftir þriggja stiga skot. Íslensku stelpurnar spila sinn fyrsta leik við Svía á morgun.

Rögnvaldur var aðaldómari í leiknum í dag en meðdómarar hans voru Per Kristian Larsen frá Noregi og Seppo Nyström frá Finnlandi. Það verður nóg að gera hjá Rögnvaldi í vikunni því hann mun dæma einn leik á dag allt mótið. Rögnvaldur dæmir leik Dana og Finna á morgun.

Rögnvaldur er að dæma á sínu þriðja Norðurlandamóti A-landsliða en hann dæmdi einnig á Norðurlandamóti kvenna í Arvika 2004 sem og á Norðurlandamóti Karla í Tampere í Finnlandi 2006.