Ágúst Björgvinsson, þjálfari A-landsliðs kvenna, hefur valið 14 manna hóp fyrir komandi Norðurlandamót í Danmörku. Íslenska landsliðið fór í æfingabúðir í Borgarnes um helgina sem heppnuðust mjög vel og í kjölfar þeirra skar Ágúst nítján manna hóp niður í fjórtán leikmenn. Þrjár æfingar, óvissuferð á Hvanneyri, frábær gestrisni Borgnesinga og æfingaleikur innan liðsins voru meðal þess sem stelpurnar tóku sér fyrir hendur þennna rúma sólarhring sem liðið dvaldi í Borgarnesi.

Ferðin hófst á æfingu í Íþróttahúsinu í Borgarnesi á föstudeginum en í kjölfar hennar borðaði liðið síðan saman á Hyrnunni, frægum stoppustað á hringveginum. Eftir matinn fóru stelpurnar í óvissuferð á Hvanneyri þar sem þær fengu að kynnast ýmsu í tengslum við íslenskan búskap, fyrr og nú, enda staddar á aðalstarfsstöð Landbúnaðarháskóla Íslands. Nýfæddu kálfarnir vöktu sérstaka lukku og þá var mikið hlegið og klappað þegar keppt var í sveita-fitness.

Daginn eftir var önnur æfing fyrir hádegi en eftir hádegismat fór hluti liðsins í reiðtúr á meðan aðrar skelltu sér í sund. Þriðja og síðasta æfing helgarinnar fór síðan fram eftir kaffi þar sem skipt var í tvö jöfn lið og leikinn æfingaleikur þar sem stelpurnar tóku vel á því á meðan þjálfarinn Ágúst Björgvinsson og aðstoðarmaður hans Finnur Freyr Stefánsson fylgdust vel með úr stúkunni. Einn reynslumesti dómari landsins, Borgnesingurinn Einar Þór Skarphéðinsson, dæmdi leikinn og stóð sig vel að vanda.

Í lok ferðarinnar buðu þau Ámundi Sigurðsson og Ragnheiður Guðmundsdóttir, ásamt fjölskyldu til veglegrar grillveislu og þar enduðu stelpurnar vel heppnaða helgi með því að gera vel við sig í mat og drykk. Allur hópurinn vill nota tækifærið hér og þakka þeim hjónum fyrir frábærar móttökur alla helgina sem og glæsilega veislu.

Ágúst Björgvinsson hefur nú tilkynnt hvaða fjórtán leikmenn munu æfa með liðinu fram að Norðurlandamóti. Það fara síðan tólf leikmenn með liðinu út á Norðurlandamótið sem fer fram í Gentofte í Danmörku dagana 5. til 9. ágúst næstkomandi.

Fjórtán manna hópur A-landsliðs kvenna fyrir NM 2008:

Bakverðir:
Helena Sverrirsdóttir, Haukar/TCU
Hildur Sigurðardóttir, KR
Ingibjörg Jakobsdóttir, Grindavík
Pálína Gunnlaugsdóttir, Keflavík

Litlir framherjar:
Jovana Lilja Stefánsdóttir, Grindavík
Kristrún Sigurjónsdóttir, Haukar
Margrét Kara Sturludóttir, Keflavík
Petrúnella Skúladóttir, Grindavík

Stórir framherjar:
Fanney Lind Guðmundsdóttir, Hamar
Helga Einarsdóttir, KR
María Ben Erlingsdóttir, Keflavík/UTPA
Sigrún Sjöfn Ámundadóttir, KR

Miðherjar:
Ragna Margrét Brynjarsdóttir, Haukar
Signý Hermannsdóttir, Valur