16 ára landslið drengja vann í morgun mjög öruggan sigur á Norðmönnum, 104-80, þar sem strákarnir léku sem ein heild og hreinlega völtuðu yfir Norsku piltana á löngum köflum.

Leikurinn var jafn framan af og leiddu íslensku strákarnir með 1 stigi, 13-12 þegar um 3 mínútur voru eftir af fyrsta leikhluta. Þá small vörnin og strákarnir náðu 6 stiga forystu við lok leikhlutans, 19-13.

Það var svo í öðrum leikhluta þar sem leiðir fóru að skilja. Íslensku strákarnir pressuðu mjög stíft og fengu margar auðveldar körfur út úr því, en Norðmenn áttu í stökustu vandræðum með að koma boltanum á samherja á sóknarvelli. Strákarnir náðu góðri forystu, 38-19, en létu ekki þar við sitja og leiddu með 32 stigum í hálfleik, 64-32.

Seinni hálfleikur varð aldrei spennandi, íslensku strákarnir léku af öryggi og gáfu þeim norsku aldrei færi á að komast inn í leikinn. Staðan að loknum þriðja leikhluta var 88-51 og aðeins formsatriði að klára leikinn. Lokatölur, eins og áður segir, 104-80, en Norðmenn skoruðu margar auðveldar körfur undir lok leiksins þegar úrslitin voru orðin ljós.

Íslenska liðið lék hreint frábærlega í leiknum, en helsti styrkur þess var liðsheildin. Allir leikmenn liðsins lögðu sitt af mörkum og það skilaði sér í góðum og öruggum sigri á Norðmönnum.

Haukur Helgi Pálsson lék frábærlega fyrir íslenska liðið, skoraði 30 stig, tók 10 fráköst, stal 7 boltum og átti 3 stoðsendingar á 24 mínútum. Skotnýting Hauks var til fyrirmyndar, 8 af 10 tveggja stiga skotum rötuðu rétta leið sem og 2 af 3 þriggja stiga skotum. Björn Kristjánsson skoraði 20 stig (3 stolnir), Hjalti Valur Þorsteinsson skoraði 18 stig (7/7 í tveggja, 2 stolnir), Elvar Sigurðsson skoraði 12 stig (3 stolnir, 4 stoðsendingar), Ólafur Helgi Jónsson 8, Oddur Ólafsson 5 stig (4 stolnir, 3 stoðsendingar), Óli Ragnar Alexanderson 4
(4 stolnir, 3 stoðsendingar), Anton Örn Sandholt 3, Andri Þór Skúlason 2, Styrmir Gauti Fjeldsted 2 (3 fráköst, 3 stolnir, 3 stoðsendingar).