Keflavík og ÍR mættust í þriðja leik liðanna í undanúrslitum Iceland Express deildar karla í kvöld. Keflavík vann stórsigur á ÍR 106-73 og minnkuðu þar með muninn í einvíginu í 2-1.

Keflvíkingar mættu mjög grimmir til leiks og spiluðu mjög stífa vörn á ÍR-inga sem virtust ekki vera viðbúnir hörku Keflavíkur. Keflvíkingar hittu mun betur en í fyrri leikjum og virtust hafa endurheimt sjálfstraustið.

B.A. Walker skoraði 23 stig og Tommy Johnson skoraði 22 stig fyrir Keflavík en einnig voru Jón Nordal og Magnús Þór Gunnarsson atkvæðamiklir í liði Keflavíkur.

Næsti leikur í einvíginu verður á sunnudag klukkan 17:00. Það má búast við troðfullu húsi í Seljaskóla en gríðarleg stemmning hefur verið á leikjum liðanna.