Ísland sigraði Möltu 98-53 á Smáþjóðaleikunum í San Marínó í gær og hefur þar með tryggt sér sigur í sínum riðli og sæti í undanúrslitum mótsins.

Leikurinn gegn Möltu byrjaði vel og var greinilegt að leikmenn ætluðu sér að byrja betur en í hinum leikjunum á undan. Það var strax kominn 10 stiga munur og svo bættist jafnt og þétt ofan á það til loka leiks. Lið Möltu lék 2 - 3 svæðisvörn nánast allan leikinn og við það hægðist aðeins á leiknum en strákarnir fundu svo leiðina að körfunni og tóku við að salla niður körfunum.

Þegar upp var staðið var staðan 98 - 53 okkar mönnum í vil, glæsilegur sigur. Allir leikmenn Íslands komu við sögu og skoruðu þeir allir. Herbert sem var að leika sinn 100. landsleik var stigahæstur með 18 stig, Helgi Jónas kom næstur með 17, Logi og Sævar voru með 10 stig aðrir minna. Friðrik Stefánsson var sem fyrr með flest fráköst eða 11.


mt: Herbert Arnarson fyrirliði íslenska landsliðsins lék sinn 100. landsleik gegn Möltu í gær.