Nú er leikjum kvöldsins lokið í Iceland Express deild karla. ÍR og Grindavík tryggðu sér sæti í undanúrslitunum.

ÍR sló út Íslandsmeistara KR í DHL-Höllinni í kvöld. ÍR átti frumkvæðið í leiknum, náði góðu forskoti og hélt því allan leikinn. Lokatölur voru 74-93. Hreggviður Magnússon var funheitur í liði ÍR og skoraði 29 stig í leiknum.

Grindvíkingar byrjuðu einnig vel gegn Skallagrím. Þeir leiddu 29-15 eftir fyrsta leikhluta og héldu svo forystunni það sem eftir var af leiknum og tryggðu sér sigur 93-78. Þorleifur Ólafsson kveikti í netmöskvunum í kvöld en hann skoraði 30 stig í leiknum.

Það er því ljóst að Keflavík mun mæta ÍR í undanúrslitum og Grindavík mun leika gegn Snæfelli.

Leikur Keflavíkur og ÍR verður á sunnudag í Toyotahöllinni í Keflavík en Grindavík og Snæfell munu mætast á mánudag í Grindavík.