Ísland vann Andorra á Smáþjóðaleikunum í San Marínó í gær 80-64. Leikurinn byrjaði ekki allt of vel fyrir okkur. Spennustig leikmanna var ansi hátt, þeir voru svo spenntir að hefja leik. Leikmenn Andorra eru mjög fljótir og ekki auðvelt að eiga við þá.

Eftir fyrsta leikhluta var staðan 13 - 16. Sami barningur hélt áfram í öðrum leikhluta og þegar flautað var til hálfleiks var staðan 28 - 31. Við breyttum leikskipulaginu talsvert í þeim síðari. Mun betra jafnvægi komst á leik okkar manna og leikmenn aðeins yfirvegaðri í sóknarleiknum. Þegar þriðji hluti var búinn var staðan 47 - 47. Síðasti leikhlutinn var algerlega eign okkar og unnum við hann 33 - 17.
 
Friðrik Stefánsson lék mjög vel, hann skoraði 16 stig og tók 15 fráköst. Logi Gunnarsson kom af bekknum og setti 17 stig og þar af 3 þriggja stiga körfur. Jón Arnór skoraði 14 stig. Jón Nordal og Páll Kristinsson tóku það að sér að stöðva besta leikmann Andorra, sem skoraði mikið á fyrstu 15 mínútunum. Það gerðu þeir vel auk þess sem Jón Nordal átti mikilvæg sóknarfráköst á lokamínútunum.
 
Stigaskor leikhluta: 1.  13 - 16  2.  15 - 17  3. 19 - 14  4. 33 - 17.
 
Í dag leikum við gegn Monaco sem vann Möltu í dag 68 - 60.