Körfuknattleikssamband Íslands hefur undanfarnar vikur og mánuði verið í leit að nýju mótakerfi enda kerfi það sem notað er í dag komið til ára sinna og erfitt viðfangs í nútímaumhverfi þar sem krafan um upplýsingar í rauntíma eru miklar. Eftir heilmikla leit hefur KKÍ nú fundið kerfi sem uppfyllir þær kröfur sem sambandið setur en það er kerfi sem margir körfuknattleiksunnendur ættu að þekkja enda hefur FIBA Europe notað það undanfarin ár og heitir SmartStat/CMS og er frá litháísku fyrirtæki að nafni MBT.

Fulltrúar KKÍ hittu menn frá MBT í Kaupmannahöfn á dögunum þar sem farið var yfir málin og í kvöld var fyrsta prufa á Íslandi þar sem leikur Grindavíkur og KR í úrslitakeppni kvenna var sendur út live og tókst vel til. Kerfið verður prófað áfram í einhverjum leikjum nú í úrslitakeppnunum og frá og með næsta hausti er stefnt að því að allir leikir í Iceland Express deild karla og kvenna ásamt 1. deild karla verði sendir út beint.
Kerfi þetta er notað eins og fyrr segir af FIBAEurope auk þess sem ACB deildin á Spáni notar það, LKL deildin í Litháen, finnska sambandið, slóvenska sambandið ásamt fleirum og enn fleiri eru á leiðinni.

Það er þó rétt að ítreka það að kerfið er enn í prófun og er t.d. allt á ensku ennþá en verður íslenskað þegar framlíða stundir.

Eins og fyrr segir verður kerfið prófað í einhverjum leikjum nú í vor og verður greint frá því á kki.is jafnóðum hvaða leikir það verða og jafnframt hver slóðin er.
Það er von KKÍ að með tilkomu þessa kerfis verði það leiðandi í upplýsingamálum kappleikja á Íslandi eins og verið hefur undanfarin ár.