Í kvöld voru þrír leikir í Iceland Express deild kvenna. Keflavík tryggði sér deildarmeistaratitilinn með því að sigra KR.

Keflavík mátti tapa með þremur stigum eða minna í kvöld til að tryggja sér deildarmeistaratitilinn en það var ljóst að þær ætluðu sér sigur í þessum leik. Keflavík var mun sterkari aðilinn í leiknum og sigraði 59-90.

Haukar unnu góðan sigur á liði Grindavíkur í Hafnarfirði. Lokatölur leiksins voru 87-73. Victoria Crawford, nýr leikmaður Hauka, skoraði 42 stig og tók 10 fráköst í leiknum.

Í Hveragerði sigraði Hamar lið Vals 81-66 þar sem LaKiste Barkus var nálægt því að ná þrennunni eftirsóttu. Hún skoraði 28 stig, tók 10 fráköst og sendi 8 stoðsendingar í leiknum.