Í kvöld verða fjórir leikir í Iceland Express deild karla. Allir leikirnir hefjast klukkan 19:15.

Í Borgarnesi verður stórleikur þegar Skallagrímur tekur á móti Grindavík. Skallagrímur er í 4. sæti deildarinnar með 20 stig en Grindavík í því þriðja með 24 stig. Grindvíkingar unnu fyrri viðureign liðanna 90-74.

Í Garðabænum mætast Stjarnan og Njarðvík. Þessi lið eru að berjast á sitt hvorum enda töflunnar, Stjarnan er í fallbaráttu á meðan Njarðvíkingar vonast til að komast nær toppliðum deildarinnar. Stjörnumenn fóru með sigur af hólmi í fyrri viðureign liðanna í Njarðvík 78-81.

Á Sauðárkróki mætast Tindastóll og Snæfell. Tindastóll er 4 stigum á eftir Snæfelli í deildinni en Snæfell vann síðasta leik liðanna nokkuð auðveldlega 101-73.

Í Hveragerði má búast við miklum baráttuleik þegar Hamar tekur á móti Þór frá Akureyri. Hamar er í neðsta sæti deildarinnar með 6 stig en Þór er í 7.-9. sæti með 12 stig. Það má því búast við að bæði lið leggi allt í sölurnar til að bæta stöðu sína í deildinni. Þórsarar höfðu betur í fyrri leik liðanna í vetur 92-74.

Staðan í deildinni.