Finnur Freyr Stefánsson verður aðstoðarþjálfari Ágústar Björgvinssonar hjá A-landsliði kvenna en Ágúst tók við liðinu af Guðjóni Skúlasyni í vikunni og mun þjálfa liðið næstu fjögur árin. Framundan er þátttaka í Norðurlandamóti í Danmörku í ágúst og svo fyrri hluti b-deildar Evrópukeppninnar seinna um haustið.

Finnur Freyr hefur verið aðstoðarmaður meistaraflokks karla hjá KR undanfarin ár, fyrst hjá Herberti Arnasyni en svo hjá Benedikti Guðmundssyni. KR varð Íslandsmeistari í vor undir stjórn Benedikts sem hafði þá Finn sér til aðstoðar.

Ágúst og Finnur Freyr þekkja vel til hvors annars en þeir voru saman í þjálfarateymi KR í upphafi tímabilsins. Ágúst hætti sem aðstoðarþjálfari KR-liðins þegar hann tók við liði Hamars í byrjun nóvember en Finnur Freyr hélt áfram sem aðstoðarþjálfari Benedikts Guðmundssonar. Finnur Freyr hefur auk þess að vera aðstoðarþjálfari meistaraflokks karla undanfarin ár, þjálfað yngri flokka hjá KR og er einnig þjálfari Körfuboltaakademíu félagsins.

Finnur Freyr hefur áður komið að landsliðsmálum hjá KKÍ en hann var aðstoðarþjálfari Bojans Desnica hjá 20 ára landsliði karla sem tók þátt í B-deild Evrópukeppninnar í Búlgaríu sumarið 2005.