Fjórir leikir fóru fram í Iceland Express deild karla í kvöld og höfðu heimaliðin betur í öllum tilfellum.

Í Njarðvík tóku heimamenn á móti Fjölni og höfðu 12 stiga sigur, 87-75. Sigurinn kom Njarðvíkingum upp í fjórða sæti deildarinnar, þar sem Skallagrímur tapaði sínum leik.

Topplið Keflavíkur tók á móti Skallagrím og höfðu sigur, 92-80

Í vesturbæ Reykjavíkur unnu KR-ingar 6 stiga sigur á Tindastól, 97-91. Þar með tylltu þeir sér í annað sæti Iceland Express deildarinnar, tveimur stigum fyrir ofan Grindavík, en Grindvíkingar eiga þó leik til góða.

ÍR-ingar unnu öruggan sigur á Snæfelli í Breiðholtinu, 102-77. ÍR er því komið upp að hlið Snæfells í 6.-8. sæti deildarinnar með 8 stig.

Annað kvöld fara tveir leikir fram í Iceland Express deild karla, þegar Grindvíkingar fara norður yfir heiðar og sækja Þór frá Akureyri heim og Stjarnan tekur á móti Hamar.